林瑞麟 憶政改神蹟

【明報專訊】曾主理政改事務多年嘅前政務司長林瑞麟，前年離開政府後去讀神學，即使返咗香港都好低調，無乜亮相公開場合，不過為信仰佢就好熱心，兩星期前（10號）佢去咗港福堂講道，題目為「於神沒有難成的事」，佢分享經歷時提到政改，形容2010年通過政改係神蹟，話神向「眾人以為死嘅方案吹氣，令佢活過嚟」。


林瑞麟喺講道中話，2009年展開上次政改工作，一直事無寸進，直至2010年6月知道民主黨表明，如果中央接受「一人兩票」方案就會支持，於是佢同時任律政司長、同係基督徒嘅黃仁龍一齊向特首曾蔭權提出，希望煲呔能再向中央提一人兩票方案。過兩日佢哋一班基督徒高官又去咗黃仁龍官邸祈禱，話希望神可以「轉動領導人嘅心」，令政改通過，最終神蹟出現。


林瑞麟話雖然離開咗政府，但都為官場嘅人祈禱，又為政改問題求問神，希望香港可以再次經歷柳暗花明。


高官中嘅教徒定期有祈禱會，林瑞麟透露佢係喺2004年引入政府嘅，原來當年有牧師同佢講，美國某處有官員、議員定期嘅祈禱會，點解佢哋唔試吓呢，於是佢就喺官員之間組成祈禱會，最初成員仲包括當年3個局長廖秀冬、馬時亨同李少光，自此祈禱會就延續咗3屆政府喇。