一家落水 唐唐挑戰CY

【明報專訊】淋冰水幫「漸凍人」嘅行善活動玩咗多日，可能大家已有啲悶，但被人點名嘅都要按承諾「找數」，好似被旅發局主席林建岳點名嘅全國政協常委唐英年，雖然噚日下午就出發去北京出席政協常委會議，但佢朝早就先喺屋苑泳池找數，仲點名挑戰佢特首選舉嘅兩個對手﹕特首梁振英（CY）同民主黨何俊仁。


唐唐淋冰，全家人都要落水，片段所見，佢先自淋一桶冰水，佢太太郭妤淺亦將另一桶冰水潑向老公，唐唐打算反擊拉住老婆不果，反而幾個仔女就輪流向老竇淋水，最終囡囡更將老竇推落泳池；仔女又將媽咪推埋落水，結果變成全家混戰，連唐唐嘅公關大員Thomas亦不能倖免。


唐唐向CY同阿仁下戰書，佢話趁星期日，希望畀個機會梁振英同全家人一齊玩淋冰。


唐唐亦不忘捐錢，向香港肌健協會捐出1萬蚊。