何俊仁領回鄉證被狙擊

【明報專訊】噚日3名泛民立法會議員，包括民主黨何俊仁、社民連梁國雄同工黨何秀蘭分別去咗上環中旅社申請一次過嘅回鄉證，以便今日去深圳出席政改座談會。不過，何俊仁喺中旅社被市民「狙擊」，不斷問佢「你啲黑金去咗邊」，搞到佢好尷尬，走嘅時候仲搵錯路。


早前有自稱「壹傳媒股民」向傳媒報料，聲稱壹傳媒集團主席黎智英向民主黨、公民黨、社民連等泛民政黨捐錢，但其實何俊仁個人並無涉及此事，而佢噚日被市民狙擊時，都無作出任何回應。


特快通道 10分鐘完成申請

長毛梁國雄、何秀蘭同何俊仁申請證件時，都諗住守規矩同其他人一齊排隊等候，不過中旅社職員就為佢哋安排「特快通道」，由影證件相、填表申請同拎收據，只需10分鐘左右搞掂。


長毛著咗件印有「毋忘六四」嘅白T恤去影相，職員就好「貼心」為佢搵咗件軍綠色外套，畀長毛著住影相。據中旅社喺網上列出嘅相片要求，其中一項係「申請人宜著深色有領服裝」。何俊仁見到張證件相，就笑住話好似警察喺7月2號「學界佔中」拉咗佢之後幫佢影嗰張，但靚過中旅社呢張。