工黨講正恩 張曉明嚇親

【明報專訊】中聯辦主任張曉明會見泛民議員最後一日，傾嘅係嚴肅政改課題，雙方立場有別，但會面時都有輕鬆場面。工黨議員帶同印有朝鮮最高領導人金正恩嘅單張，去政府總部同張曉明見面，工黨主席李卓人質疑朝鮮嘅選舉，都係「一人一票」，係咪都要袋住先，又話特首普選選舉權和被選舉權同樣重要，否則香港情况就會好似朝鮮。張主任一見到張海報，就即刻叫大家唔好講住，話「不然會影響外交交涉」。


張主任誤當番梘係月餅

其實張曉明見泛民議員都已經見咗兩日，不過有請願就係首次。另一工黨議員何秀蘭（阿Cyd），就向張主任送上番梘（肥皂），寓意「我要有得『揀』」。不過，臨近中秋，張主任就差啲誤會咗阿Cyd送上嘅番梘係月餅，搞到阿Cyd即時要澄清個月餅係「假東西」，叫張主任千祈唔好當真月餅食。張主任亦笑笑口，話真係好驚訝，仲笑住話原本當阿Cyd係好人喎！


邱騰華終可「獨霸」梳化

另一方面，律政司長袁國強、特首辦主任邱騰華同政制及內地事務局長譚志源，喺之前兩場於政府總部舉辦嘅政改會晤，都同擠喺一張梳化，但由於公民黨噚日只有4個議員參加會面，會議室多空位，特首辦主任邱騰華終於有機會「獨霸」一張梳化，譚志源同袁國強就要繼續「分享」，但工黨同張主任見面時，3個高官就要「打回原形」坐番埋同一張梳化。