內地工廠超豪宿舍港生羨慕

【明報專訊】百仁基金旗下百仁之友計劃上個禮拜帶咗仁濟醫院第二中學一班中四、中五學生，到訪百仁基金副主席、美昌集團董事顏志永喺韶關嘅玩具廠房，但令學生「嘩嘩」聲嘅係員工宿舍生活，好似別墅酒店咁，有泳池、足球場、桌球室等，又有好味自助餐，有同學話想入去間廠工作"口添"。
顏志永同Emily解釋點解要有咁豪嘅宿舍，佢話上一代辦廠嘅理念係要以人為本，除咗畀到員工工作機會，仲要畀到佢哋生活環境，尤其好多員工一年只係返得屋企兩次，大部分時間都留喺工廠，所以要有個好環境等佢哋工作得舒服。
百仁之友計劃係幫香港優秀嘅中學生安排唔同嘅專業培訓，增加佢哋競爭力，顏志永趁暑假帶佢哋去參觀玩具廠。呢間玩具廠近年最威嘅，係佢哋獲國家獨家授權生產玉兔號登月車同嫦娥三號模型，仲獲國家主席習近平邀請生產20幾件玉兔號月球車模型，作為畀其他國家嘅外交禮物。除咗睇廠房，佢哋亦同廠裏面12名內地學生暑期工交流。