羅致光「被提醒」 唔好隨便叫人「袋住先」

【明報專訊】溫和建制派人士近期同溫和泛民走埋一齊搞「尋求共識實現普選」聯署，事後有傳建制派被人「照肺」。不過，Emily收到風，原來參與聯署嘅民主黨羅致光近日高調評政改，黨內都有唔少意見，被人「提醒」發言要謹慎一啲，唔好隨便叫人「袋住先」。


事緣喺咁嘅，羅致光周日喺電台節目評政改，呼籲社會喺有條件接受「袋住先」，其實羅致光嘅講法係有前提，佢有話政改方案要符合《基本法》同人權法，同無不合理限制。不過，Emily聽聞，民主黨同日搞集思會，唔少兄弟提出意見，話羅致光雖然無背離黨嘅立場，但隨便講「袋住先」，容易惹人誤會，更可能會被建制派捉住一句嚟做文章，所以都提醒黨員，以後遇到「袋住先」、「係選舉都有篩選」等詞彙，就要格外留意，少用為妙。