黃潔慧離商台赴英讀碩士

【明報專訊】商台烽煙節目主持黃潔慧噚日喺節目同個人facebook宣布會喺中秋節，即係下月8號之後離開商台，攞全額獎學金去英國倫敦政經學院（LSE）修讀比較政治碩士。繼李慧玲之後，佢係半年來第二個離開商台嘅時事節目主持人。


攞獎學金 當「中場休息」

黃潔慧同Emily講，舊年11月報獎學金都係抱住試吓嘅心態，無諗過成功，而獲得全額獎學金就好似「爭取真普選一樣，可一不可再」。對於開咪生涯告一段落，佢就話「沒有可惜或不可惜」，「而是我個人選擇」，仲話「人生上半場要尾聲了，咁中場休息一年，返嚟，再起步打下半場」。


黃潔慧又提到，李慧玲年初被解僱一事係「契機」，令佢「醒起」自己舊年已報名申請獎學金，但就形容由報讀到取得獎學金，都係交由命運決定。至於離開後會唔會對現時節目有影響？佢話，商台晨早節目包括佢在內有4名主持，本來已經足夠開兩個節目啦。