蘇錦樑內地義教自稱「乖乖」

【明報專訊】家仲係暑假，唔少政府高官趁立法會休會呢段時間叉電，商務及經濟發展局長蘇錦樑（Greg）上星期就放假，佢無選擇去陽光海灘或者遊埠，而係去河南省一個「留守兒童」（指父母外出打工，而自己留在農村生活的孩子）嘅暑假營，做咗幾日「乖乖老師」。


點解叫做乖乖老師呢？阿Greg話佢哋上到去，每個老師都要改個名等學生稱呼佢哋，而佢個名Greg又唔係咁易讀，所以就講歪少少，變成「乖」字，結果佢嗰幾日都叫做乖乖老師，而佢就主要教學生英文。


除咗教英文，本身玩開音樂嘅Greg，仲特登買咗兩個結他同鼓去，教學生玩學器，佢話見到班學生嘅笑容都覺得好開心，雖然只係去咗幾日，但已經好唔捨得，仲話多次忍唔住喊！Greg話見到「留守兒童」喺起跑線上比其他學生差，父母因為經濟問題要去其他省市打工，佢諗緊有咩辦法可以幫吓佢哋，例如港商係咪可以去當地投資，創造就業等佢哋嘅父母唔使去外省打工。