上落樓梯輪椅

【明報專訊】坐輪椅人士要上落樓梯真係唔容易，坊間樓宇嘅樓梯亦唔一定有運輸平台可以運送輪椅上落。47歲嘅本土發明家李少麟，就發明咗一部全球首創用履帶取代車轆、可以全自動上落樓梯嘅電動輪椅——「必飛越障椅」。


貴一般電動輪椅兩倍

李少麟話，新發明可以幫傷殘人士上落達35度斜度嘅梯級，亦可以克服崎嶇不平路面。「必飛越障椅」第一批20部輪椅已投入生產，定價12.8萬港元，但比一般電動輪椅（約4萬元）貴兩倍。


發明者李少麟話，「必飛越障椅」嘅二段式履帶驅動技術同雙翼安全鎖係佢自己發明，已經喺9個國家拎咗專利。呢架輪椅同其他輪椅最大分別，就係用二段式履帶，運行嗰陣輪椅就好似條蛇咁，因應梯級嘅斜度、高度同深度自動修正。「必飛越障椅」能夠承受半噸重量，而雙翼安全鎖能夠加強輪椅嘅安全同穩定度。


自動調節斜度 能承半噸重量

李少麟仲同Emily講，佢1985年中學畢業後，做咗4年漫畫助理，之後做埋玩具及機器設計，「我鍾意打破傳統，自己一手一腳做設計」。


2010年，佢睇電視見到香港無障礙設施不足，就喺度諗，點解設計商唔可以做架上到樓梯嘅輪椅。佢用咗4年時間，終於研發咗呢部越障椅。


一出世下半身癱瘓嘅阿茵就話，雖然「必飛越障椅」有啲貴、上梯時有啲搖，但如果經常上落樓梯，都會考慮購買。