外遊低頭族 港人唔算多

【明報專訊】小琴平日搭地鐵，經常見到「低頭族」，男女老少一律低頭睇手機。早兩日有議員建議立法，規定低頭族要讓座。但原來放眼全球，香港人都唔算係最愛手機嘅群體。Hotel.com全球調查發現，香港人旅行時需要「機不離手」嘅比例，只排調查地區嘅第11位。


呢項調查涉及全球28個國家及地區，其中亞洲以「絕對優勢」成為民眾旅行時最「機不離手」嘅地區，前6位全部是亞洲國家，其中泰國高踞榜首，有85%受訪者稱旅行時要經常望手機，中國和台灣分別位列第4和第6位，均高於香港。


調查又發現，大約三分一港人旅行過後，會後悔浪費太多時間睇手機，但仍有四分之三受訪者表示假期出遊會用手機查工作電郵。呢個結果好有趣，因為調查發現有近七成受訪者想借旅行忘掉工作，亦充份反映咗香港人對工作又愛又恨又想走又怕失去嘅矛盾心情，學羅家英話齋，真係好難以捉摸。其實，港人旅行需要手機，亦因為要保持喺社交平台蒲頭，無論行到邊，都一定要Po下旅行靚相、睇下八卦新聞喎。