發展局古樹選舉 投票可中獎

【明報專訊】本港目前有約500棵古樹名木，為咗加深港人對古樹認識，發展局5月30日至9月12日舉辦「最喜愛的古樹名木」選舉，發展局長陳茂波噚日喺網誌撰文話，唔少古樹嘅樹齡有幾十甚至超過100年，見證香港發展，陪伴港人度過好長歲月，成為本地文化寶藏一部分，例如有悠久歷史嘅錦田「樹屋」，日治時期村民爭取保護、位於茘枝窩風水林嘅「五指樟」，位於油麻地廟街嘅「榕樹頭」等。


唔少古樹亦為社區提供優美景觀，陳茂波特別提到喺尖沙嘴彌敦道兩旁、由細葉榕組成嘅綠色走廊；以及海防道嘅樟樹群等，均為市民提供大片綠蔭。佢話希望市民踴躍參與投票，以肯定古樹名木嘅獨有價值，仲話投票時可以豐富市民對本港環境嘅認識。


古樹名木分4組

今次選舉中嘅古樹名木會分為「形態出眾」、「植物學及生態價值」、「歷史及文化意義」、「景觀貢獻」4個類別，每個組別頭3名票數最多嘅古樹名木，將獲選為「最喜愛的古樹名木」。


市民只要參與網上投票，都有機會中獎，獲得1000元購物禮券同證書一張，名額20個；詳情可瀏覽網址（http://www.trees.gov.hk/treescontest）。