白鴿黨核心聯署惹質疑

【明報專訊】一班建制、泛民及學者前日罕有「大和諧」拖住手公布聯署，話社會對峙情緒同行動不斷升溫，希望各方平心靜氣商普選，避免社會兩極化變成亂局。據聞部分泛民人士前日見到聯署名單既有泛民成員又有佔中人士，都打咗個突，認為喺政改討論風頭火勢之際，唔應該同建制派人士企得太埋咁話。


Emily聽聞民主黨部分黨員對中常委吳永輝參加聯署有啲意見，質疑吳身分係中常委，係咪可以用個人身分參加。吳永輝同Emily講，聲明內容同民主黨支持「三軌方案」嘅立場無衝突，主席劉慧卿亦支持要溝通。佢話聯署唔涉及實際政策內容，參加聯署唔使向政黨批准。吳永輝話，知道黨內部分成員對佢參加聯署有反響，但佢認為民主黨喺爭取「真普選」嘅前提下應該容許更闊嘅光譜。而另一個支持佔中嘅胡志偉牧師就話，唔覺得加入聯署係同建制派行得太埋，簽名都唔會改變理念。