申訴專員出擊查門牌錯漏

【明報專訊】Emily經常要去唔同地方做採訪，間中都有大廈或者店舖有「消失的門牌」情况出現，要靠附近商舖門牌號數去「斷估」。申訴專員劉燕卿噚日宣布主動調查，審研差餉物業估價署（差估署）對樓宇門牌號數嘅管理，仲話過往不時收到市民投訴，包括有唔少樓宇無標示門牌號數、政府部門同市民通信所採用嘅號數又同差估署編配嘅唔同等等，歡迎市民喺9月8日或之前提交意見。


申訴專員話，香港唔單止建築物密集，人口活動又頻繁，門牌號數清楚標示、統一準確好重要，否則會令市民同遊客都好唔方便。


質疑差估署未履行職責

佢認為差估署負責編配同監管門牌號數，雖然有提醒地舖業主或使用人、大廈業主立案法團等必須標示門牌，但成效不大，令人質疑差估署係咪有盡力履行職責，所以專員要主動調查有乜嘢不足。


市民可以透過郵寄、傳真或者電郵至申訴專員公署complaints@ombudsman.hk，表達意見。