廣州書展設「香港館」 全部書要審批

【明報專訊】政府創意香港辦公室贊助出版業界290萬，喺今明兩年嘅廣州、北京、台灣書展設立「香港館」，免出版社場租擺檔，帶領本土書衝出香港。


香港出版總會理事兼項目籌委會主席李家駒話，家喺內地賣書，包括今次展出嘅書，都要經內地部門審批，通過審批可以喺指定地點發售。咁咪好多書唔賣得？李家駒話，本港出版業好熟悉內地出版情况，好少會畀人彈回頭，據佢了解唔少社科書都過到關。


創意香港贊助290萬

「南國書香節」今個月15至21號喺廣州市琶州國際會展中心舉行，「香港館」面積大約1000平方米。屆時會有31間出版社、29個印刷商同1間電子出版社參展。主辦單位仲精心挑選咗150種係香港書展首次出版嘅書，當中有唔少本土書，例如中華書局嘅《港島海岸線——消失中的風景》、《香港電車：叮囑110年》等。本港出版業同月會參加北京國際圖書博覽會。出年2月就參加台北國際書展。


李家駒話，本港一套書有時兩至三年都係賣約1萬本，但曾試過將一套書嘅版權賣畀內地，首批已印咗3萬本。不過，佢話所有書要通過內地部門審批先可以喺指定書店賣，審批一般需要兩個月，希望內地遲下可以簡化程序。