CY休假5日 離港慶祝60大壽

【明報專訊】特首梁振英（CY）放暑假，公布喺8月6日至10日休假離港。CY係農曆七月十四（8月9日）嘅所謂「鬼節」生日，有人就話唔知CY係咪想避一避，選擇喺海外度過60歲大壽咁話。至於CY新曆正日係8月12日（下周二），嗰日佢會如常返工。


Emily噚日見到政府新聞公告，話CY休假，但唔肯講佢去邊度玩，但據知今次目的地唔係中國內地。CY放假期間，政務司長林鄭月娥將署理行政長官職務。


Emily好奇，點解感覺上CY成日都話放假，今年已經放過4次，原來佢每次都係攞幾日工作日嘅假期，然後夾埋周六、周日自製長假。特首一年有22日假期，CY上任2年，即係44日假，而佢首兩年總共攞咗33.5個工作天嘅假期。