香港寬頻殺入中半山

【明報專訊】豪宅林立嘅中半山區，對於商家嚟講一定係無限吸引嘅市場。不過呢一區嘅寬頻服務，就一直被PCCW壟斷，其他運營商就梗係睇唔過眼啦。噚日香港寬頻宣布殺入中半山，月費低至298蚊。佢份新聞稿就貫徹一向嘅寸嘴作風，話呢區住客終於「不必受制於單一服務商的昂貴服務」，毫不留情寸爆對手。


寸爆PCCW 毫不留情

香港寬頻話，從即日起至9月30日，中半山區居民可以登記298蚊月費套餐，享受1000M寬頻上網同埋HKBN戶外Wifi服務，呢項月費計劃維持24個月不變，並豁免安裝費。香港寬頻強調「要讓香港人用合理的價格享受高速服務」。的確相比之下，長期獨攬呢區寬頻服務嘅PCCW，又真係收費不合理，小琴噚日打電話去查詢，1000M上網，每個月盛惠598，唔知多個對手，會唔會都反省下，降價惠民呢？


呢次進軍中半山，香港寬頻除咗個Plan吸引，宣傳海報都落足心機。中半山豪宅有一大部分係外國人居住，海報特登搵咗個外籍Model，希望呢班富貴客可以轉用佢個新Plan喎。


[小琴密語]