馮檢基余若薇 撐宣明會舊書義賣

【明報專訊】民協馮檢基、公民黨余若薇噚日出席宣明會一個舊書義賣活動，各自捐出兩本書支持。馮檢基捐出自己喺6月出版嘅新書《逆轉人生》，話呢本書回顧咗佢戲劇性的前半生，三度經歷咗「逆轉之門」，包括愛情史，佢話自己讀港大一年級時，遇上心儀對象，苦戀18年，多次鼓起勇氣表白，但一次又一次咁被拒絕，後來終於感動到佳人，仲促膝談心至深夜咁話。


馮檢基談18年苦戀史

至於余若薇就分享咗另一個不可逆轉嘅故事，佢捐出由香港海豚保育學會會長出版嘅《豚出沒注意》，話20年來圍繞白海豚嘅基建工程繼續，機場第三條跑道工程如箭在弦，撞着白海豚3個主要活躍區交匯處，影響不但深遠，而且不可逆轉。


盼籌180萬改善內地小學

宣明會「舊書回收義賣大行動」噚日起至8月6日喺鑽石山荷里活廣場舉行，今年逾35萬本舊書，包括教科書、兒童圖書、小說等，其中特價書售價低至5蚊起，籌款目標係180萬，全數善款會用作支持廣東省連南寨崗鎮迴龍小學興建新綜合樓。