蔡東豪《主場》員工茶敘

【明報專訊】《主場新聞》上周六突告結束，之前一直有傳《主場》噚日會舉行員工大會，所以有好多記者噚日一早去咗《主場》位於觀塘嘅辦公室守候，但見唔到有員工出入。不過，Emily聽聞一眾《主場》員工其實去咗九龍灣一間酒樓飲茶敘舊，連日來都無現身嘅創辦人蔡東豪終於現身，席間蔡東豪不斷多謝同事嘅努力同支持，但對結束《主場》嘅原因並無補充。


Emily聽講《主場》員工聚會咗兩個鐘，其間除咗敘舊，都有處理遣散費問題，據聞數目好過勞工法例要求。


李兆富：政治光譜有咁闊得咁闊

唔少網民都慨嘆少咗《主場》呢個輿論平台。不過另一邊廂，財經專欄作者李兆富（Simon）受到《主場》事件啟發，趁機喺今日推出新網媒《全民媒體》。佢笑言自己「大陸一年都返唔到一次」，唔擔心來自內地嘅政治壓力，但就話希望《全民媒體》嘅「政治光譜有咁闊得咁闊」，左中右立場嘅文章都歡迎。