新同盟收投訴 指普通話泳客多咗

【明報專訊】炎炎夏日，泳池係消暑好去處，有政黨噚日去政府總部請願，不滿自由行旅客迫爆本港公眾泳池云云，特別係鄰近內地嘅新界西北區泳池，因此要求政府取消一簽多行，紓緩問題咁話。


加入咗新民主同盟約8個月、現為社區主任嘅譚凱邦，話新同盟最近喺屯門、上水及大埔接獲區內居民10宗投訴，指逢周日公眾泳池變得特別擠迫，譚相信由於受影響泳池鄰近內地，如屯門西北泳池鄰近深圳灣口岸，加上最近《南方都市報》宣傳跨境游泳，令新界西北區泳池出現迫爆情况。


投訴稱浴室現糞

不過，夏天放暑假，多咗學生哥，唔少泳池都大受歡迎，點樣去分邊啲係自由行、邊啲係港人呢？譚凱邦話，有經常喺上水泳池游水嘅居民話，近期多咗講普通話嘅泳客，衛生情况亦轉壞，例如淋浴室排水位驚現糞便，懷疑同內地泳客有關。


康文署：定時監控水質

Emily問過康文署，康文署回應話，近日天氣炎熱，游泳池使用率自然高，但未有就內地泳客作統計，又話有定時監控水質。該署又話，上水泳池過去一年曾因水質問題兩次關閉作徹底消毒；大埔游泳池及屯門西北游泳池並無發生上述事件。