新聞類別
財經
詳情#
【明報專訊】通街都知耀才證券（1428）做生意夠晒出位，近年曝光率仲相當高，基本上打開電視睇財經台，都會見到耀才搵「何B」何守信拍嘅廣告，仲有廣東話同普通話雙版本"口添"。之不過，舊年佢哋搞埋黃金交易生意，出街個廣告就踩中地雷，噚日畀證監會譴責廣告製造假象，仲罰咗成70萬元。
話說個廣告喺舊年8月尾到9月中見街，喺4張報紙同耀才自己個網度賣，小琴無炒開金，對個廣告真係冇乜印象。證監就話個廣告內容，畀人一種錯誤信息，耀才環球金業同佢哋嘅黃金交易，受到證監規管咁話。大家都知證監係唔管呢啲嘢嘅，咁自然要走出嚟講清楚啦。
有錯就要認，耀才都出番個啟事話，多謝證監話佢哋聽，黃金交易唔受規管，仲乘機賣多次廣告，話耀才金業不代客操盤、不設授權制等等，對啲客夠晒公平咁話。當然，以佢哋向來牙尖嘴利嘅作風，唔會講聲多謝咁簡單啦，喺啟事入面仲打蛇隨棍上，要政府規管黃金交易，以免其他良莠不齊嘅同行呃投資者。
email: piano@mingpao.com
[小琴密語]
留言 (0)
