謝偉俊談佔中：為理想可接受

【明報專訊】立法會議員謝偉俊（Paul）噚日出席一個商會活動，分析青年人對議會印象嘅調查結果。有記者問阿Paul點睇議會外嘅佔中行動，阿Paul話佔中以身試法，如果係為崇高理想，以自我犧牲精神嚟喚醒社會良知嘅做法，係相當高嘅情操，可以接受。不過佢補充話，如果佔中行動攞唔到個神髓、達唔到目的，而年輕人貪得意、羊群心態咁參加就唔好。


不贊成立會暑假加會

國際青年商會香港總會噚日公布嘅調查話，網上訪問約300人，有超過五成18至40歲受訪者話反對議員「拉布」。對於有超過六成受訪者話贊成議員暑假加開會議審議議案，阿Paul話平時立法會工作已好繁重，暑假可以畀議員休息吓、做吓地區工作，唔贊成加開會議。佢又幾次主動提及今屆政府淨係識做行政工作，唔識協商政治，指特首唔同議員打好關係，令到多個議案例如新界東北同三堆一爐撥款申請，都出現拉布情况，最後要硬闖，畀市民一個好壞嘅印象。