CY去論壇 停車場早封一粒鐘

【明報專訊】香港專業聯盟下嘅青年組今日將喺黃竹坑香港醫學專科學院舉行論壇，邀請特首梁振英同一班嘉賓到場。Emily收到風，今日會場嘅保安嚴密，活動雖然下午兩點15分正式開始，但醫專嘅停車場將喺1點至3點半不能出入。


嘉賓泊位頭痕

黃竹坑醫專位置較僻，一般嘉賓都係自己開車去，但若果跟足安排，似乎要提早1點前就要到場，否則一係搭的士、一係將車泊喺附近，怪唔得有啲嘉賓咁頭痕。有說係特首辦要求封停車場，專業聯盟主席劉炳章就話唔清楚，已將Emily嘅查詢交畀相關人士。佢今日都要出席呢個活動，Emily問佢係咪都要1點前到 ，劉炳章只係話佢自有安排啦。


特首辦解畫：免阻醫院路

特首辦回覆話，今日活動有數百人參與，不少參加者會自行駕車到場，鑑於醫學專科學院位處雙線單程路同埋鄰近醫院，為免阻塞道路，影響緊急車輛出入，所以主辦機構先有咁嘅安排。