「唔鍾意鬧人」卿姐：我溫柔到爆

【明報專訊】民主黨主席劉慧卿出名「聲大夾惡」，佢接受商台節目主持人陳志雲錄影訪問，陳志雲就話每次見到卿姐講嘢都青筋暴現；身穿紅裙嘅卿姐就玩溫婉，即刻作狀用手摸摸面珠，然後用調皮聲線話，「無呀，我今日幾好呀！」講到呢句話時，不但陳志雲忍唔住，連卿姐自己都頂唔順大笑。


接受志雲訪問陰聲細氣

陳志雲續問卿姐鬧人可以去到幾大聲，卿姐就陰聲細氣話，「唓，我都唔鍾意鬧人，我溫柔到爆呀！」卿姐話平時咁勞氣係因為政府好不堪，好多人忍唔住要移民、對普選無希望，但佢對住鏡頭話，「我哋都會好落力，好肉緊咁樣，需要好大聲咁樣為香港人去爭取普選同埋好嘅管治制度！」不過，當攝影師近鏡影佢時，卿姐雙手又摸摸頸項話，「阿仔，有無青筋呀，哈哈，無喎，皺紋就有好多」。