新聞類別
財經
詳情#
【明報專訊】係香港扎根81年嘅老字號永隆銀行，自從2008年畀招商銀行（3968）收購咗後，真係「女大十八變」，品牌愈做愈「潮」﹗早兩日小琴行過會展嗰間永隆分行，初時以為門口塊資訊板係一般LED顯示屏，點知睇睇下發現塊板點解望得「穿」，原來係用咗玻璃屏幕，好Cyber Feel喎。
小琴噚日同永隆助理總經理及零售銀行主管鍾少權食飯，佢話呢塊玻璃屏幕叫做e-glass，係一塊可以用嚟顯示資訊嘅玻璃，因為半透明，分行睇起嚟會更有空間感。鍾生話，呢項科技係永隆重塑品牌嘅元素之一，遲下仲會引入到其他分行，包括太子正在翻新嘅分行，8、9月會用，仲有11月會係銅鑼灣開幕嘅全新旗艦店。
除咗玩玻璃，永隆仲識玩埋微信，近排佢地已經開咗個官方帳號，係上面半價賣旅遊保險。鍾生話反應好好，推出4個禮拜，來自微信嘅旅遊保保費收入，已佔非分行銷售業務嘅三成，永隆下星期一仲會以新形象示人，全線職員會換新制服，到時唔好唔認得啦！
email: piano@mingpao.com
[小琴密語]
留言 (0)
