傳放棄自家微博 騰訊未認輸

【明報專訊】騰訊（0700）近排股價勢頭回勇，不過內地傳媒噚日有報道就話，騰訊將正式「戰略性放棄騰訊微博」，即係唔會再為微博投放新資源，當然亦都唔會研究新功能，只係維持基本嘅營運，唔通想投降輸一半？

只係「調整緊」

騰訊發言人後來就承認集團調整緊，但否認傳聞所指，集團會放棄2010年開始搞嘅騰訊微博，話近排只係整合主要由新聞、視頻及微博組成嘅網絡媒體事業群喎。


其實騰訊主席馬化騰同阿里巴巴執行主席馬雲呢兩隻熱鬥小馬，喺微博界都鬥咗幾年，不過，馬化騰嘅騰訊微博，一直鍊唔過阿里巴巴有份持股嘅新浪微博。


如果馬化騰接受現實，喺其他範疇再同馬雲鬥過，未嘗唔係好事。尤其騰訊嘅微信有成幾億用戶，專心諗計仔發掘賺錢門路，好過為咗人有我有做啲回報低嘅生意喇。


email: piano@mingpao.com

[小琴密語]