小米搞埋手機意外保

【明報專訊】家啲科技企業最鍾意踩過界，好似噚日啱啱開咗產品發布會嘅小米咁，除咗推新手機同新產品小米手環之外，仲搞埋手機意外保險，包保碎mon（手機屏幕）同意外入水，送埋免費維修，不過，小琴對小米印象一向係「粗用」，對於無端端要畀多99蚊人仔換保養，划唔划算真係見人見智。


不鏽鋼外殼無出現

小米噚日舉行年度發布會，董事長雷軍宣布推出配合內地4G制式的小米4手機，將於7月到9月期間經過三間內地電訊商推出。16GB機售價係1999蚊人仔，64GB機售價係2499蚊。不過，米粉最期待嘅不鏽鋼外殼就無出現，小米高層話新機的確有用不鏽鋼，至於喺邊就有待發掘。


「萬能」手環 冲涼戴都得

小米仲出埋首款穿戴式智能設備小米手環，用佢可以唔使撳密碼解鎖，做運動量監測、當做智能鬧鐘，跟瞓覺嘅深淺程度，用震機或鬧鐘方式，叫大家起身。最殺食嘅係，連冲涼都可以戴上來用，講到萬能咁。佢地又貫徹平霸策略，客仔只需畀79蚊人仔……啲功能好熟口面？咪咁啦，小米講到明係sell性價比，幾時有話sell原創啫？有網民睇完個發布會，不禁係網上留言：「雷布斯」可能當自己緊玩劍網三。


雷軍仲賣個關子畀行家知，小米手環同手機實現互通後，佢地可以係MIUI雲嘅基礎上，推出更加多嘅手環服務。咁究竟係乜嚟㗎，又要等下一輪雷軍開估。


email: piano@mingpao.com

[小琴密語]