民記籌款細項 蔣麗芸話可公開

【明報專訊】壹傳媒集團主席黎智英向泛民政團、議員捐款資料外泄，引起網民對政黨捐款嘅關注。唔知大家記唔記得，民建聯今年4月喺會展舉行籌款晚會，籌得破紀錄嘅6838萬元捐款，當日條數自然成為網民「翻舊帳」嘅主要對象。


晚會籌6838萬 當日未公布細項

Emily記得，晚會競投情况太熱烈，部分環節有啲混亂，所以記者只係報道部分競投結果，例如中聯辦主任張曉明捐出一幅自己寫嘅「駿程萬里」大字，被內地房產商世茂房地產主席許榮茂以1380萬元投得。事後記者向民建聯查詢，但該黨唔肯公布籌款晚會帳目細項。


記者函中委跟進

事隔幾個月，民建聯副主席蔣麗芸（Ann姐）批評黎智英向泛民捐款時，就有新講法，Ann姐話，若社會要求政黨要公開條數，民建聯第一個公開都無所謂，又話自己睇過晚會籌款條數。


Emily見Ann姐開誠布公，立即問佢可唔可以提供當日捐款細節呢，但Ann姐話公開捐贈者名單係好嚴肅嘅事，要中委同意，叫Emily寫封信，轉交中委決定。民建聯咁啱噚晚開中委，Emily立刻照做，點知Ann姐話，民建聯中委會呈文件，一般要兩星期前通知委員。


結果？呢筆較黎智英被指捐畀泛民政團更大筆嘅錢，至今來自何方，仍未公開。而Ann姐都好有交帶，對Emily嘅要求回應話「noted」。