蔣麗芸搶長毛鳥籠「為佢好」

【明報專訊】立法會政制事務委員會噚日開會，討論政改諮詢報告，社民連梁國雄（長毛）帶咗鳥籠去開會，諷刺政改係鳥籠民主，不過就多番畀民建聯成員挑釁，先有「高佬」何俊賢話個道具阻到佢視線，令佢睇唔到政務司長林鄭月娥。到長毛發言時，蔣麗芸（Ann姐）更加無厘頭行去長毛座位前，一手拎走佢枱面嘅鳥籠，激到長毛紮紮跳。


Ann姐當時不動聲色，慢慢行去長毛嘅位置，等長毛無防備時一手拎走鳥籠，擺去會議室嘅另一邊。長毛即時高喊，向主持會議嘅民建聯主席譚耀宗投訴，情形就好似學生向班主任舉報同學搶佢嘢咁，但班主任似乎唔係好理佢哋。譚主席反而話可能係個鳥籠阻住Ann姐嘅視線，又話佢會議後可以拎番。Ann姐繼續挑釁，反指長毛上次都「偷」民建聯啲文件啦，指長毛之前一次會議攞走咗民建聯議員放喺枱面嘅文件。


雖然其他民主派議員都要求譚主席處理，但譚並無理會，長毛唯有自己去拎番個鳥籠，又將鳥籠打爛。譚主席就警告長毛，打還打，唔該唔好打爛會議廳內嘅物件。Ann姐就話，佢拎走長毛個鳥籠唔係因為阻礙佢視線，而係擔心長毛又掟嘢，又犯刑事罪行，「同事一場，我都想佢好，唔想佢再坐監！」