戴耀廷客串DJ播舊歌

【明報專訊】上個禮拜財爺曾俊華上商台打碟，噚日就請到佔中發起人之一戴耀廷做DJ，戴耀廷揀咗侯德健嘅《龍的傳人》、林子祥嘅《邁步向前》、The Beatles嘅The Long and Winding Road，以及《血染的風采》等，似乎呢個客串DJ揀嘅都係舊歌。


戴耀廷又話，對音樂劇《孤星淚》嘅Do You Hear The People Sing印象特別深，佢1989年去英國留學時第一次聽呢首歌，加埋之後睇咗套音樂劇，就覺得非常鍾意，從此之後就變成佢嘅電話鈴聲。


聽蔡琴 嘆同老婆相處減

蔡琴嘅《白髮吟》對戴耀廷亦十分有意義，因為其中一段獨白講述一個丈夫同太太喺幾十年婚姻中一齊食咗5萬餐飯，戴耀廷就話，原本佢每晚都會同太太一齊食飯，但搞咗佔中後同太太相處時間減少咗，如果去到5萬餐飯，或者要到70多歲先得喇。戴耀廷話，希望快啲順利結束佔中，就可以有多啲時間同家人一齊食飯。