蔡子強新書 爆財爺愛中湯

【明報專訊】書展又到，中大政治與行政學系高級講師蔡子強今年以食為先，蒐集咗多個政治人物嘅飲食習慣，出版《餐桌上的領袖》一書，大談宋慶齡與大閘蟹嘅恩怨、毛澤東吃辣外交、曾國藩連食燕窩都要加辣粉等等小故事，另外仲有香港篇，蔡子強比較咗特首梁振英、政務司長林鄭月娥同財政司長曾俊華嘅宴客菜單。佢話，曾俊華雖然住過美國，予人洋化感覺，但宴客時主要以中菜為主，仲話佢比較鍾意飲老火湯，宴客會請人飲清補涼瘦肉湯，而唔係魚翅燕窩嗰類。


林鄭請客 有議員唔夠喉

至於林鄭宴客，分量就較小，蔡子強話，林鄭喺2012年11月請基本法委員會主任李飛等人食飯，呢場午宴非常簡單，無備酒，菜式係三菜一麵一飯，包括西蘭花醬爆蝦球、十香醉肉排、鮮菇扒時蔬、飄香荷葉飯、金菇炆伊麵、蓮子紅豆沙，對男士來說可能未必飽；而林鄭搞政改飯局，宴請立法會議員時，亦只係五菜一湯，當時有議員食完仲要去消夜。梁振英嘅政改飯局就豐富少少，多一道菜。