大屋遭爆格 黃英豪﹕家財唔值錢

【明報專訊】「金至尊」間尖沙嘴新店噚日開幕，除咗有代言人陳慧琳出席，近日間山頂大屋被爆格嘅老闆黃英豪都有到場做主禮嘉賓，不過佢噚日見到小記時就不願多提，佢話皆因珠寶店開幕，都係低調啲好，唔係畀人一見佢係珠寶店老闆，又爆多次格咁話。


講開爆格，黃英豪話佢原來住喺福臨門「七哥」徐維均隔離，不過佢就話自己相比「七哥」做開酒家煮鮑魚益食家，放喺屋企嘅就相對無咁值錢，但真係唔知自己屋企點解畀賊仔睇中。


不過，一講番生意黃英豪就雞啄唔斷，佢話香港資源（2882）已經喺大陸同共青團同埋青年聯合會合作，搞咗個網幫年輕人搵工，公司家仲係曾志偉旗下嘅A Star主要股東，將會打入電影電視後期製作領域，接埋荷里活嘅特殊效果製作生意過嚟做，佢又賣關子話，話唔定第日有機會同謝霆鋒間PO朝霆合作，各位拭目以待啦！

email: piano@mingpao.com

[小琴密語]