3.3米史諾比尖東彈起

【明報專訊】繼多啦A夢後，又有一個香港人熟悉嘅朋友進佔尖沙嘴海旁，佢就係史諾比（Snoopy）喇。海港城今日起至8月12號會有個「『夢想起航』史諾比藝術及生活展覽」，除咗有結合東方色彩嘅史諾比書法同工藝品，亦有堪稱全球最大、3.3米高嘅史諾比雕塑。


全球最大Snoopy雕塑

Emily噚日率先去5支旗杆睇睇，原來一共有4個史諾比雕塑，每隻有唔同高度同形態，每個雕塑下都有唔同時期、由1960到1990年代嘅花生漫畫。負責設計嘅日本藝術家大谷芳照話用咗motion art嘅手法，4隻史諾比睇落好似由地底漸漸跑上地面咁。


雕塑旁亦有結合咗史諾比同漢字嘅書法作品，大谷芳照話想用漢字帶畀港人花生漫畫正面嘅信息。佢最鍾意嘅就係「笑」字同「夢」字，話希望大家開心同對未來有希望。