財爺暗諷議員係偏心母親

【明報專訊】工黨李卓人早前用《聖經》中所羅門王話要斬開BB一半，去分辨BB真正母親嘅比喻，批評政府如果真係關心民生議題，就應該將重要嘅民生項目調前啲審議，等財委會盡快通過撥款，唔應該將民生項目變成犧牲品。估唔到噚日財政司長曾俊華，就用番同一個《聖經》比喻，呼籲議員盡快通過「三堆一爐」等政策。


引所羅門王談撥款審議

財爺話佢理解，故事中BB真正嘅母親為咗保護孩子唔被殺害，寧願放棄爭個BB，財爺話其實大部分財委會議程都係「母親的兒子」，反駁議員要求調動議程，其實係要政府保護佢哋鍾意嘅BB，放棄一啲被佢哋針對嘅BB，好似三堆一爐咁。佢呼籲議員要有政治承擔，唔好只係支持受歡迎嘅項目，亦都要支持必須、但唔受部分市民歡迎嘅項目。財爺話相信市民都有所羅門嘅智慧，睇得出邊啲議員係為香港整體利益寧願承擔政治風險嘅「真母親」喎。