南順推懶人蛋糕預拌粉

【明報專訊】港人着重健康飲食習慣，唔少人都鍾意玩吓自家製蛋糕。擁有「刀嘜」、「金象」等多個家喻戶曉品牌嘅南順（0411），近月將推出曲奇預拌粉同蛋糕預拌粉系類。話晒南順係香港老牌企業，完全摸清港人想「煮食」又怕煩嘅心態。用佢哋嘅產品，無論整麵包或者曲奇，都省卻唔少麻煩。


所謂預拌粉，即係只需要加蛋落油，適當攪拌就可以入焗爐嘅懶人之選。南順香港集團市務及業務發展總管黃廣林（圖）噚日同小琴講，南順60年前就喺香港入口小麥，之後一路為酒店、餐廳、大型麵包房度身訂做獨家麵粉配方。今次嘅預拌粉，集團大廚擺咗好多心思喺上上面，所以點整都一定成功。黃生仲話，好快會響香港推網購，買8包預拌粉即免費送貨。小琴平時都係懶人一個，不過整蛋糕最有成就感嘅就係將蛋清完美哋打泡，等出爐嘅瞬間檢驗功夫到唔到位，用預拌粉雖然快靚正，但就少咗啲驚喜。


[小琴密語]