家燕姐義助撲滅罪案

【明報專訊】騙徒手法層出不窮，警察都要搞搞新意思！警方喺網頁及手機App加入一個新嘅防止騙案環節「童叟無欺」，有唔同種類騙案嘅資訊，希望巿民可以透過智能電話，更方便獲得防騙知識。


幫警方拍片教防騙

Emily睇過新加入嘅防騙資訊，入面有各種類型騙案，包括網上騙案嘅文字資料介紹，仲有影片教大家拆穿騙徒西洋鏡。Emily見到影片有防騙短劇，主演者係大家熟悉嘅薛家燕。


商業罪案調查科總督察鮑兆銘話，家燕姐今次係義務幫手推介防騙資訊，參演者仲有一班阿sir同madam，佢哋都係公餘時間幫手，幕前幕後都見到佢哋嘅身影。


鮑sir話，網上騙案有上升趨勢，數字顯示，社交媒體騙案喺今年首4個月有174宗，比上年同期52宗多咗兩倍，裸聊升咗超過四倍達225宗，大家的確要打醒十二分精神。


巿民今日起，喺警隊App、警隊網站或者佢哋嘅youTube頻道都會睇到防騙資訊。