呂大樂跳槽教院

【明報專訊】早幾日教育學院公布第二次向教育局申請正名為大學，噚日就公布挖角成功，請到香港大學重量級教授呂大樂過檔，唔知咁做會否令佢哋今次正名機會大增呢？原本喺港大做社會學系系主任嘅呂大樂，下個月1號正式加盟教院嘅亞洲及政策研究學系，出任香港社會研究講座教授。


下月出任講座教授

Emily睇到呢個消息，即刻打畀呂大樂，佢話教院校長張仁良早喺上任前已經游說佢過檔，好有誠意，感覺到張仁良好想推動有關香港嘅研究，「大家又覺得好啱傾」，所以就決定過檔。呂大樂又話，張仁良畀佢好高自由度，講到明「想做咩就做咩」咁話。


張仁良上任前已斟呂

呂大樂喺港大畢業後去英國牛津大學攻讀碩士同博士學位，之後返香港教書，去過城市理工學院（城大前身）及中大任教。呂大樂嘅研究範疇包括階級分析、經濟社會學、城市社會學，同埋香港社會研究等。佢寫咗多本有關研究社會運動、新中產階級同城市社會兩極化嘅書，令佢喺香港愈嚟愈多人識。