巴西輸波 蔣麗芸抽水講立會

【明報專訊】噚日凌晨巴西對德國，結果主辦國巴西1﹕7大敗，比數之大令球迷大跌眼鏡，facebook亦被賽果洗版。民建聯蔣麗芸（Ann，圖）借世界盃抽水，話見到呢個賽果，有朋友就覺得立法會應該引用特權法，調查巴西大敗原因，因為懷疑呢個係世紀大騙局，亦有人建議財委會主席吳亮星翻睇錄影帶，睇吓有無人打假波。


陳克勤唔信賽果捽眼

對於有指巴西輸波隨時暴動，佢又話有人建議不如提緊急質詢，問吓去巴西旅遊仲安唔安全等等。


Ann姐等建制派呢排可能壓抑太大，所以借賽果諷刺立法會會議文化啦，但對巴西球迷嚟講，睇到都未必笑得出。例如捧巴西隊嘅民建聯陳克勤，話自己遲咗起身，一開電視巴西已經輸緊5球，佢以為自己睇錯，捽吓對眼行埋個電視機面前睇清楚。無黨派黃毓民就話自己買波就買德國，但見到巴西輸咁多球都覺得好傷心。


長毛質疑巴西假波

捧荷蘭嘅工聯會郭偉強亦有睇波，佢話無諗過咁一面倒。社民連梁國雄質疑巴西打假波，形容巴西嘅表現好似港足天水圍飛馬咁，當中以5號費蘭甸奴最有嫌疑，因為每球失波都關佢事喎。