田二少 促讓座立法

【明報專訊】唔少公共交通工具都有指明某啲座位畀有需要人士，不過噚日新民黨立法會議員田北辰就喺立法會大會上關注，話因為香港嘅禮讓文化未普及，要求政府就讓座立法。田二少仲講咗一個活生生嘅「例子」，話噚日揸車返立法會，喺條雙程路想轉右，「一路等，我後面唔知塞咗幾多十架車，前面無一架車會停一停畀我轉右」，證明香港禮讓文化根本未普及。


佢又話家公共交通上有唔少「低頭族」，啲人睇唔到真正有需要嘅人，又或假裝無留意其他人需要座位，講講吓仲要求運房局長張炳良「微服出巡」，多乘搭公共交通工具，體察民情。


張炳良回應話平日搭公共交通機會少，但不等於無乘搭，自己親身觀察係有「低頭族」避免因為唔讓座而尷尬，但亦有人樂於起身讓座，因此唔能夠話整個社會無禮讓文化。


佢又話，如果公民教育做得好，意識好，就唔需要立法規定讓座，因為咁係需要成本，如執法人手等等。