陳雲生辦邊派罐頭邊籲反佔中

【明報專訊】民建聯屯門區議員陳雲生早前聲稱有人向6．22投票者派雞髀，民主派中人已否認有呢件事，今次就輪到陳雲生畀人質疑派嘢叫人反佔中喇。話說有街坊向工黨譚駿賢報料，話陳雲生友愛邨嘅議員辦事處噚日派罐頭龍眼同埋叫人簽名反佔中。Emily問過陳雲生，佢話呢個係美麗嘅誤會，係因為義工唔夠，先至兩檔嘢一齊搞，義工有同街坊講明唔使簽名都可以拎罐頭。


陳：唔簽名也可拎罐頭

聽完陳雲生嘅解釋，件事變咗羅生門，因為譚駿賢話，有啲街坊對佢講，因為冇簽名，所以拎唔到罐頭，不過佢亦見到有街坊話唔使簽名都拎得。


今次陳雲生派咗480罐罐頭，佢話自己要開區議會，返到嚟見到兩檔嘢一齊搞，問番先知係義工唔夠人，而有啲市民拎罐頭，有啲市民簽名，有啲兩樣都做，絕對冇話要簽咗名先可以拎罐頭。