《信報》報道梁齊昕

【明報專訊】特首梁振英（CY）捲入干預傳媒嘅指控，《蘋果日報》網台主持李慧玲噚日喺節目《壹錘定音》透露，近日官場流傳，梁振英女兒梁齊昕向《信報》網站記者講CY發放家人英國合照係公關伎倆後，CY曾致電信報老闆李澤楷，要求他炒咗負責訪問嘅記者。Emily就事件向特首辦及透過電訊盈科企業傳訊部向李澤楷求證，特首辦話不評論事件，電盈公關於截稿前未回覆。


李澤楷否認CY致電促炒記者

李慧玲話曾致電李澤楷求證，並引述李澤楷稱，CY無打電話畀佢要求佢解僱負責該新聞嘅記者，又指自己當日人在海外無留意事件，事後有人話佢聽先知道有件咁嘅事。李慧玲話曾追問李澤楷，咁CY事後有無打電話畀佢呢？李澤楷無正面回應，只重複CY無打電話要佢解僱負責報道嘅記者。


大家好關心信報記者有無受壓，Emily於是問過負責網站嘅信報副社長及數碼媒體總裁陳景祥，佢話唔知道CY有無打過電話畀李澤楷，但重申自己、同事都無因為呢件事受壓，強調當時按新聞專業採訪同報道咁話。