海關工會聲明似文匯社評

【明報專訊】工聯會屬下香港海關人員總會前晚出咗份聲明，支持警方對七一遊行後「預演佔中」嘅示威者嚴正執法。不過，呢份聲明逃唔過網民嘅眼，有人發現，呢份聲明有抄襲之嫌，似足《文匯報》6月16號嘅社評〈支持警方執法 遏止暴力氾濫〉、7月3號嘅社評〈支持警方執法 維護繁榮穩定〉，同埋7月4號嘅報道〈九龍社聯挺警方清場〉。眼利嘅網民仲將涉嫌抄襲嘅部分，用唔同顏色highlight，好似以前Emily溫書時啲筆記。


1200字 千字涉抄襲

Emily搵番嗰幾篇《文匯報》鴻文對一對，發現份聲明真係近乎「搬字過紙」，成篇近1200字嘅聲明，得200字係自己寫，其餘都同報章文章近乎一樣，最多只係將原文啲句號變做感嘆號。有網民就指出，海關其中一個責任係保護知識產權，唔應該抄襲，仲叫佢哋做「海賊」。


工會主席：我無嘢講

Emily就打番畀海關人員總會主席陳志光，問佢係咪抄襲，佢就答﹕「係咩？係呀？我無嘢講呀，哈哈哈，我無嘢講呀」，又話無「抄嘅問題」，只係「諗法都係咁樣諗法，你哋話點，我無乜回應畀你」。Emily就覺得佢句「我無嘢講」似曾相識，唔知喺邊度聽過。