梁太鬧人變「鬧自己」

【明報專訊】特首梁振英嘅太太唐青儀日前以一句「我不禁倒抽一口涼氣」，批評中大政治與行政學系高級講師蔡子強熱爆全城；前晚網民Jacky Fung將梁太呢個訪問片段配上音樂「二次創作」，變成一首新歌《一口'梁'氣－JFung Remix》，片段中梁太唔止Rap得入型入格，被改版本後梁太嘅對白，就由鬧蔡子強，變成鬧自己「無知、涼薄」！特首辦就話不評論呢段短片。


莫乃光：料不違修訂版權例

將梁太嘅說話倒轉嚟惡搞，立法會資訊科技界議員莫乃光話，由於Jacky創作有關時事，亦係諷刺，就算日後過咗修訂版本嘅《版權條例》，相信唔會有問題，唯一可能出事嘅，就係唔知首歌有無版權咁話。


Jacky創作嘅新歌Remix版，將梁太訪問「剪接再剪接」，例如將梁太批評蔡子強嘅用詞，用番喺梁振英、梁太上，剪接後版本，變成「齊昕嘅母親，無知、涼薄」、「齊昕嘅父親，冷血、刻毒」，另外又重新剪接梁太一番話，令人覺得梁太「講呢句說話，純粹公關伎倆，係應傳媒要求，純粹係語言偽術」。


Jacky喺YouTube度話，新曲「純粹設計對白，乃公關伎倆，如有雷同，實屬不幸！」

中大政政校友促梁太道歉

另一邊廂，中大政政系校友同學生噚日發表聯署聲明，批評梁太唔單止扭曲蔡子強文章嘅內容，亦嚴重詆譭咗一個資深香港政治學者同佢哋嘅老師。佢哋感到憤怒，又促請梁太公開道歉及收回言論。