啦啦隊聯盟挑戰賽 港集亞洲精英

【明報專訊】一提到啦啦隊，好多人會諗起運動場邊打氣嘅少女少男，其實啦啦隊員都可以係運動員，政府新聞網噚日就話，投資推廣署今年初幫手成立咗個「香港啦啦隊聯盟」，希望喺學界加強推廣競技啦啦隊，同埋培訓更多本地教練、定期舉辦國際賽事，令呢個項目喺亞洲發揚光大。


競技啦啦隊員會結合舞蹈、特技、翻騰、跳躍等動作表演，變化多端，例如可以係隊員交叉打筋斗，亦可以成隊人集體打筋斗；跳躍就分為分腿跳（跳高時雙腿張開）、摺體跳（將身體摺合）等，有時仲會有疊羅漢，或者由3個人組成一個「籃」，拋高一個運動員，等佢喺空中打筋斗，再將佢接住，呢個動作好講求隊員間嘅合作同互信㗎。


港奪高級組亞軍

競技啦啦隊源於美國，每年都會舉行國際賽，每隊由幾個人至廿幾個人都有，年齡同性別都無限制，評判會按隊員嘅動作技巧、隊形、團隊合拍度及表演氣氛評分。香港啦啦隊聯盟技術委員會主席陳志豪話，隊員動作必須整齊，仲要配合音樂，若音樂急促、動作緩慢，就唔好睇。


香港啦啦隊聯盟啱啱喺6月底舉辦咗首個啦啦隊亞太區挑戰賽，澳洲、內地、台灣、新加坡和菲律賓都派隊嚟參賽，香港隊都有參加，獲得高級組亞軍。