Ann姐：點解無泛民仔女佔中

【明報專訊】民建聯立法會議員蔣麗芸（Ann姐）言論經常語出驚人，七一遊行後，數以百計市民通宵留守中環遮打道，511人被捕，當中唔少係學生。蔣麗芸前晚喺facebook發帖，話收到朋友短訊，佢唔識回應，希望網民幫吓手，原來係質疑511個被捕者中，無泛民立法會議員、佔中三子等人嘅子女。


個信息話，如果無泛民議員、佔中三子或前政務司長陳方安生、民主黨創黨主席李柱銘同埋壹傳媒主席黎智英嘅子女喺裏面，咁佢哋就唔應該鼓吹其他人嘅子女去犯法同公民抗命，又話其他細路都有父母所生。蔣麗芸噚日同Emily講，如果有家長好支持平反六四，都會帶佢哋去六四晚會了解一下，咁點解泛民咁支持佔中，又唔帶佢哋嘅子女去公民抗命呢？


面對蔣麗芸呢種說法，有5個仔女嘅公民黨陳家洛就叫大家唔使咁認真看待，因為「認真便輸了」，認為有關言論無邏輯可言。