學民仔首入十大政團

【明報專訊】學民思潮近排可謂「名利雙收」，繼喺七一遊行籌款成百幾萬元，噚日港大民意研究計劃嘅「十大政治團體」評分，學民思潮首次上榜，排名第8。成立3年幾，搞過反國教，近來參與政改討論、爭取公民提名，發言人黎汶洛話，可能佢哋經常就政治議題發表意見，難怪市民當咗佢哋係政治團體。不過，黎汶洛澄清，要政府肯就公民提名「開綠燈」，咁先至算「名利雙收」喎。


工聯第二 公民黨第三

港大民研喺6月分兩階段訪問近千名市民，先要求受訪者喺未經提示之下，講出10個最熟悉嘅政治團體。之後，獲提名最多嘅12個政治團體就進入第二階段評分，100分代表「絕對支持」，0分代表「絕對不支持」，按支持度由高至低順序排列得出結果。


工黨同樣首入十大

結果發現，「街工」繼2012年11月後，再次上榜評分就排名第1，獲得55.9分；工聯會對比今年2月同類調查，上升1位排名第2、得50.8分；公民黨上升3位排名第3、50.7分。工黨同學民思潮就首次進入十大，工黨排第4、得50分，學民排第8、得45.1分。