書展懷舊 展上世紀兒童讀物

【明報專訊】今年係書展25周年，貿發局同兩間書業集團合作搞展覽，會有啲陪住唔少人成長嘅舊書展出，例如有《世界兒童》、《兒童畫報》。而要數最舊嘅展品，就要數到有超過100年歷史嘅《坤輿西半球》地圖，貿發局話係喺1906年用當時先進嘅彩色石印技術印成嘅，不過噚日Emily尚未有機會睇到。


除咗上世紀五六十年代嘅兒童讀物外，展覽仲會有啲差唔多年代嘅雜誌，好似《南國電影》同《長城畫報》等，而四五十年代流行嘅「三毫子小說」都會亮相。貿發局仲話全場將有過百本舊書展出，亦會有10幾本舊書複印本畀參觀者拎上手睇過吓手癮。


參照第一間商務搭舊書店

展覽主題係回眸香港書業百年變遷，除咗睇舊書，市民亦可以試玩雕版印刷。主辦單位會以上世紀初皇后大道中嘅第一間商務印書館作為藍本，喺展覽廳搭間舊式書店出嚟，入面仲會有古董收銀機、雞皮包書紙等展品，主辦單位話希望呢個展覽可以畀大家體驗到社會嘅變遷。展覽會喺書展期間（7月16至22日）喺會展大會堂前舉行，買咗門票嘅市民就可以免費睇啦。