久違城市論壇被追罵 馬丁嘆不同舊時

【明報專訊】民主黨創黨主席李柱銘（馬丁）噚日以前《基本法》起草委員會委員身分出席香港電台《城市論壇》，點知成為重點狙擊對象。好多年無去城市論壇嘅馬丁輕嘆，示威者喺佢未開口就破口大罵，同以前嘅城市論壇好唔同。論壇後，馬丁接受傳媒訪問時，一班久違馬丁嘅「維園阿伯」仍「依依不捨」放聲大鬧馬丁，博做「背景音樂」，搞到馬丁都躁躁地，訪問後指住對方回敬一句﹕「我係講完先走！」強調唔係驚咗維園阿伯先走。


未開口便捱罵 馬丁躁躁地

愛港之聲、保衛香港運動等撐政府團體噚日群起去維園「恭候」馬丁，有維園阿伯仲拎埋啲舊剪報到場，未開場已經大罵馬丁「收美國錢」，又話佢賣港云云。佢哋一聽到馬丁發言就喝倒彩，這邊廂有人身攻擊，另一邊廂有人「吹BB」和應，更有維園阿伯聲言要除衫除褲，秩序之混亂可想而知。


席間有人不服主持人謝志峰處理手法，結果連謝志峰都鬧埋，謝志峰話無所謂，叫佢有問題打去2339 6300，直接搵廣播處長鄧忍光投訴。