子患自閉症 陳錦鴻周圍講尋支援

【明報專訊】「子女患自閉症，最重要係唔好收收埋埋，應該第一時間周圍同人講，尋求支援。」藝人陳錦鴻與DJ杜雯惠於2007誕下兒子陳駕樺，兒子3歲多時被評估為有自閉症及中度智障，陳錦鴻做了一個「非常決定」，就是把消息宣揚開去，「我四圍問人點算，唔使一個禮拜，就收到好多建議，都係其他自閉家庭走過的路，好有幫助」。目前其子在主流學校讀書，小一時考獲全班第一、全級第二，「我個仔都得，即係其他人都得，唔好放棄」。


陳錦鴻獲悉元朗發生父親斬死自閉兒後形容事件是悲劇，「如果個爸爸唔負責任，佢唔會大壓力到行呢一步。個爸爸一定好惜個仔，以為死咗係為家人好，雖然出發點係好，但行為係錯」。他呼籲同類家庭應第一時間尋求專業機構或社工協助。


陳憶述兒子被評估是自閉及智障時，「好震驚，我根本唔想信個仔有問題」。其後他選擇放棄工作，與太太一起全職照顧兒子，「好多家長唔想畀人知，我哋就選擇同人講，因為可以搵人幫，同人分享，否則兩夫婦只可以匿埋喺屋企攬住喊」。


陳氏夫婦透過別人的經驗及自己尋找資料，逐步訓練兒子說話及各項動作，「父母要好有耐性，要控制情緒，集中讚賞細路仔小小嘅進步，就算只係好少，都要大大咁讚，咁自己都會開心啲」。


及早訓練子女照顧自己

他與太太照顧兒子時，會分工合作及爭取「唞氣位」，「例如我帶個仔去行山，太太就可以有自己時間，有時佢帶住個仔，輪到我唞唞」。其家庭能有積蓄應付數年無業生活，若其他同類家庭有經濟困難，陳鼓勵對方申領綜援，「因為及早訓練好重要，等佢哋第日可照顧自己，甚至對社會有貢獻，先至唔會成為社會負累」。他指社會是一個整體，有困難時就要互相扶持，而其子經過3年多努力，現已背熟乘數表、三字經及千字文，在學校亦有不俗成績。