西醫工會叫副秘下台

【明報專訊】天氣酷熱，令西醫工會會長楊超發好燥，立法會審議緊修例要求醫生以後要書面訂藥，楊醫生同政府拗到面紅耳赤。西醫工會仲出信畀食物及衛生局長高永文，抽食物及衛生局副秘書長謝小華後腿，話謝小華指有醫生大量訂購K仔（氯胺酮）而冇紀錄而可以避過調查，對醫生好侮辱，工會話醫學上用嘅係針劑氯胺酮，醫生唔會管有K仔，工會已經寫咗信要求謝小華下台。


病人組織撐修例

關注病人權益社區組織協會幹事彭鴻昌就話﹕「病人組織撐謝小華！」贊成醫生以後要用書面訂藥，咁樣先至會對病人更有保障，之前已經有唔少醫療事故話係口頭訂藥訂錯藥。彭鴻昌話以前都有發生過醫生賣丸仔（精神科藥物）啦，謝小華只係打個譬喻解釋政府修例嘅用意，唔明西醫工會點解咁反對，唔企喺病人呢邊。