偲嫣停絕食 帳篷讓路放鐵馬

【明報專訊】噚日立法會財委會再審新界東北發展撥款，大家都諗緊聲言為咗反暴力而絕食嘅正義聯盟李偲嫣，會唔會同反新界東北示威者「正面交戰」之際，李偲嫣竟然「連人帶營」消失得無影無蹤。原來佢又入咗醫院，結果要宣布結束110小時絕食，正義聯盟秘書處發公開信，話李偲嫣連日無覺好瞓，家終於可以好好瞓一晚。


李偲嫣同Emily 講前晚凌晨兩點幾因為右邊肋骨下面劇痛，3個盟友見到佢面青青，所以夾咗佢去律敦治醫院。醫生話佢一定要停止絕食，無得出院，所以李偲嫣無奈結束絕食，但話佢喺醫院一食麥皮就嘔晒出嚟。


物資被消失 偲嫣﹕唔公平

人唔喺到，結果佢喺政總嘅帳篷同物資均「被消失」。李偲嫣好唔滿意，話隔籬另一個請願者嘅帳篷都無畀人執走，「黐線㗎，對我唔公平」，批評保安選擇性行動，強調一定會投訴到底喎。